Kito Kabeh Bakal Lungo

Poro bapak ibu hadirin sedoyo
Dulur Islam jaler estri enom tuwo

Mumpung isih urip ono ngalam ndunyo
Amal sholeh ayo podo ditingkatno

Ayo eling kito kabeh bakal lungo
Budhal songko omah nuju omah guwo

Kapan dino lan wektune wis tumeko
Kita kudu budhal gak biso semoyo

Mungguh budhale iku sa’ mongso-mongso
Gak perduli isih enom isih roso

Numpak kendaraan arane bandoso
Ono rodane papat rupo manungso

Den sandangi pakean kang sarwo putih
Den giring poro dulur tonggo lan batih

Yen wis budhal terus ora bakal mulih
Gak peduli ing ngomah ninggal kekasih

Den budhalke maring papan panggonane
Omah kang peteng ora ono damare

Omahe buntu ora ono lawange
Turune ijen ora ono kancane

Omah den tutup nganggo blabak panjang
Nuli den urugi lan den siram kembang

Poro sanak famili kang podo sambang
Podo nangis koyo wong kang lagi nembang

Kapan wis rampung sing ngiring podo mungkur
Ing kubur dewe ora sanak ora dulur

Nuli den tekani malaikat kubur
Tugase ndangu opo kang kito tandur

Bagus ing ndunyo nandur nemu baguse
Nandur olo ugo nemu balesane

Mulo poro dulur monggo ngathahake
Ngamal sholeh supoyo slamet awake

Dikutip dari:

Buku “Kumpulan Syair dan Sholawat An Najach”, Li Abi Muhammad Abdul Mu’thi Muhdi, Juz 1, Halaman 68

Pondok Pesantren Putra Putri “An Najach”
Koripan, Dawung, Tegalrejo, Magelang, Jawa Tengah, 56192

www.000webhost.com