Maulud Ingkang Suci

Poro hadirin ingkang kulo hormati
Monggo kito samiyo memperingati

Meniko wulan Maulud ingkang suci
Wulan kelahiran Gusti Kanjeng Nabi

Tanggal kaping rolas Isnen dinane
Ono Robi’ul Awal iku wulane

Ngadepne metu fajar shubuh wektune
Gusti Nabi Muhammad dilahirake

Asmo Ramane iku Sayyid ‘Abdulloh
Asmo Ibune iku Siti Aminah

Dilahirke ono ing tanah Mekkah
Nuli hijrahe ono tanah Medinah

Gusti Nabi Muhammad pemimpin ummat
Nabi ingkang badhe paring syafa’at

Ora pandang sugih ora pandang mlarat
Ono ing ndunyo lan ono ing akherat

Gusti Nabi Muhammad nabi akhir zaman
Utusane Alloh maring poro insan

Supoyo nampurna’ke akhlaq lan iman
Nuduhake marang dalan kebenaran

Wis kesebut ing haditse Gusti Nabi
Sopo wonge sing gelem nemen-nemeni

Ono ing dino lahire Gusti Nabi
Mbesuk dino kiyamat den syafa’ati

Mulo poro dulur kito ojo lali
Poro ngulama’ iku warisan Nabi

Ugo Hadits lan Al Qur’an ingkang suci
Kito kabeh kudu sregep melajari

Cekap semanten atur saking kawulo
Sedoyo kelepatan nyuwun ngapuro

Mugi Alloh paring ngilmu dateng kito
Ingkang maslahah barokah lan berguno

Dikutip dari:

Buku “Kumpulan Syair dan Sholawat An Najach”, Li Abi Muhammad Abdul Mu’thi Muhdi, Juz 1, Halaman 53

Pondok Pesantren Putra Putri “An Najach”
Koripan, Dawung, Tegalrejo, Magelang, Jawa Tengah, 56192

www.000webhost.com